தொகுப்பு - பாகம் 2

நேற்றைய தொகுப்பின் இரண்டாவது பாகம். பதிவு மிகவும் நீளமானது.

12/03/2009

பைப் கிளினர் என்று ஒரு பொருள். எதற்குப் பயன்படுத்துகிறார்கள் என்று தெரியாது. நன்றாக வளையும் கம்பி மேல் Fur இருக்கும். வளைத்தால் நன்றாக வளையும். தீஷுவின் ஆக்டிவிட்டீஸ்க்குப் பயன்படும் என்று வாங்கி வந்தேன். அதை வைத்து பாசிகளைக் கோர்த்தோம். பாசிகளைக் கோர்த்து bracelet செய்து அவள் கைகளில் மாட்டி விட்டேன். நிறைய நேரம் அணிந்திருந்தாள்.

மினி சுடோகு : நான் எப்பொழுது சுடோகு செய்தாலும், ஏதாவது ஒரு நம்பரை எழுது என்று சொல்லிக் கொண்டே இருப்பாள். அதனால் மினி சுடோகு. 2*2 கட்டம் வரைந்து, 1 முதல் 4 நான்கு வரையான நம்பரில், ஏதாவது ஒரு நம்பரை மட்டும் எழுதாமல், மற்ற மூன்று நம்பர்களை எழுதினேன். நான் எந்த நம்பரை எழுதவில்லையோ அதை அவள் எழுத வேண்டும். சரியாகச் செய்தாள். அது தந்த நம்பிக்கையில், அன்றையப் பேப்பரில் மூன்று கட்டங்களில் ஏதோ எண்களை எழுதி வைத்திருந்தாள்.

13/03/2009

Mazes கற்றுக் கொண்டாள். நான் மூன்று மாதங்களுக்கு முன் முயற்சி செய்தேன். அப்பொழுது விருப்பம் இருக்கவில்லை. இன்று விருப்பமாகச் செய்தாள். Kumon my first book of mazes புத்தகம் வாங்கி வந்தோம். அந்த புத்தக்கத்தில் முதலில் எளிதாக ஆரம்பிக்கும் mazes, செல்லச் செல்ல கஷ்டமாக இருக்கிறது. இது pencil skills, concentration, interpretation போன்றவைக்கு ஏற்றது. ஐந்து பக்கங்கள் முடித்து விட்டாள்.

Missing numbers & letters : A _ C D _ _ என்று சில எழுத்துக்களை எழுதிக் கொடுத்தால் Fill பண்ணத் தெரிகிறது. அதே போல் எண்களுக்கும். சில நாட்களாக இதைச் செய்து வருகிறோம். இப்பொழுது what comes afterரும் செய்கிறாள். 7 என்று எழுதினால், அவள் 8 என்று எழுத வேண்டும். இன்று "what comes after 4?" என்றாள். 5 என்றேன். ஒரு நிமிடம் யோசித்து விட்டு, "தப்பாச் சொல்லு" என்றாள். 6 என்றேன். முகத்தில் சந்தோஷம். "No செல்லம். நல்ல யோசித்து கரெக்ட்டாச் சொல்லு, பார்ப்போம்" என்றாள்.

அவள் (பழையப்) பள்ளியில் ஒவ்வொரு வாரம் ஒரு தீம் வைத்திருக்கிறார்கள். அதற்கு தகுந்தாற் போல் கலரிங், பாட்டு, ஸ்டோரி டைம், சர்கிள் டைம் எல்லாம் அமைந்திருக்கும். அதை முதல் வாரமே news letterரில் நமக்கு மெயில் அனுப்பிவிடுவார்கள். நாங்கள் அங்கிருந்த கடைசி வாரத் தீம் Solar system. ஆனால் உடல் நலக் குறைவினால் தீஷுவால் அந்த வாரம் போக முடியவில்லை. எங்களிடம் ஒரு solar system புத்தகமும் ஒரு ஆக்டிவிட்டீஸ் புத்தகம் இருந்தது. புத்தகத்தை படித்துவிட்டு ஆக்டிவிட்டீஸ் புத்தகம் செய்தோம். எவ்வளவு புரிந்தது என்று தெரியவில்லை.

14/03/2009

இரண்டு மூன்று மாதங்களுக்கு முன்னால், குளிர் காலத்தில் உபயோகப்படுத்தும் லெதர் ஜெர்கினின் பட்டன்களை(அது பெரிதாக இருந்ததால்) மாட்டப் பழக்க முயற்சி செய்தேன். அப்பொழுது விருப்பம் இருந்தாலும், அவளால் செய்ய முடியவில்லை. இன்று அவள் அப்பா அணிந்திருந்த சட்டையின் ஒரு பட்டனை அவிழ்த்துத் தரச் சொன்னாள். அவர் செய்ததும், அவளாகவே மாட்டி விட்டாள். மீண்டும் அடுத்த பட்டன் என்று செய்துக் கொண்டுயிருந்தாள்.

16/03/2009

இன்று மீண்டும் ஸோலார் ஸிஸ்டம் புத்தகம் எடுத்து வந்து வாசித்துக் காட்டச் சொன்னாள். ஷெக்கர்ஸ் போர்டில் சிகப்பு, கறுப்பு கட்டத்தில் சிகப்பு கட்டத்தில் சிகப்பு காயின்ஸும், கறுப்பு கட்டத்தில் கறுப்பு காயின்ஸும் வைக்கச் சொன்னேன். சிகப்பு, கறுப்பு கட்டங்கள் அடுத்து அடுத்து வந்ததால் AB Pattern போல் இருந்தது.

அடுத்து அந்த காயின்ஸ்களை தரையில் அதே பேட்டனில் அடுக்க சொன்னேன். இது ஏற்கெனவே செய்திருந்ததால், சரியாகச் செய்தாள். முடித்தவுடன் சிகப்பு காயின்ஸை மட்டும் பக்கத்திலுள்ள காயின்ஸை இடிக்காமல் மெதுவாக எடுக்கச் சொன்னேன். அதுவும் செய்தாள். அடுத்து காயின்ஸை ஒன்றின் மேல் ஒன்றாக அடுக்கி, விழுந்தவுடன் பாலன்ஸ் இல்ல என்று எடுத்து வைத்து விட்டாள்.

இதற்கு முன் ரப்பர் பாண்டை டியூபில் மாட்டினோம். இன்று ஹேர் பின்னை அட்டையில் சொருகச் சொன்னேன். மெல்லிதான அட்டையில் சொருக முடிந்தது. தடிமான அட்டையில் சொருகத் தெரியவில்லை.

17/03/2008

இன்று மீண்டும் ஸோலார் ஸிஸ்டம் புத்தகம் படிக்க வேண்டும் என்றாள். திரும்ப திரும்பப் படித்ததில் கிரகங்களில் பெயர்களை மானப்பாடம் செய்து விட்டாள். பளப்பள பேப்பரில் கலர் படம் போட்டுள்ள அந்த புத்தகம் அவளுக்கு மிகவும் பிடித்துவிட்டது.

மருந்து விட பயன்படும் dropperயினால் தண்ணீரை மாற்றினோம். இதே போல் முன்பு இங்க் பில்லர் மூலம் செய்திருக்கிறோம். அவளுக்கு விருப்பமிருக்கவில்லை. அதை pouring ஆக்டிவிட்டியாக மாற்றி விட்டாள்.
Mystery Bag போல் கண்ணைக் கட்டுக் கொண்டு, நான் கேட்கும் பொருளைத் தர வேண்டும். இந்த முறை டால்பின், மீன் உருவங்களை வைத்து விளையாண்டும். முதலில் டால்பின் வழுவழுப்பாகவும், மீன் சொர சொரப்பாகவும் இருப்பத்தைத் தொட்டுக் காட்டினேன். அடுத்து கண்ணைக் கட்டிக் கொண்டு நான் அவள் கையில் கொடுப்பதை என்ன என்று சொல்ல வேண்டும். அடுத்து ஆமையை சேர்த்தேன். ஆமையில் மேல் பகுதி மட்டும் சொர சொரப்பாக இருந்தது. அதை வைத்து கண்டுபிடிக்க வேண்டும். அடுத்து மூன்றையும் கீழே வைத்து விட்டு நான் கேட்பதை எடுத்துத் தர வேண்டும். நாலாவதாக நண்டையும் சேர்த்துக் கொண்டோம். விருப்பமாகச் செய்தாள்.

18/03/2009

எண்களில் what comes after போல் what comes before சொல்லிக் கொடுத்தேன். சில எண்களுக்கு சரியாகச் சொன்னாள். ஆனால் முன்னால் வரும் எண்களைச் சொல்வதற்கு பதில் பின்னால் வருவதையே பல நேரங்களில் சொன்னாள். அவளுக்குக் கடினமாக இருக்கிறது என்று நினைக்கிறேன். சில நாட்களுக்குப் பிறகு முயற்சி செய்ய வேண்டும்.

மீண்டும் இன்று கண்னைக் கட்டிக் கொண்டு டால்பின், மீன் கண்டுபிடித்தோம். அடுத்து "Can you please give me.." விளையாண்டோம். முடித்தவுடன் என்னிடம் எத்தனை இருக்கிறது, அவளிடம் எத்தனை இருக்கிறது என்று எண்ணச் சொன்னேன். என்னிடம் பத்தும் அவளிடம் ஒன்பதும் இருந்தது. எதுக்கு உன்னிடம் மட்டும் டென் இருக்கு என்றாள். ஒன்பதை விட பத்து அதிகம் என்று தெரியாது. அவளிடம் என்னிடமிருந்த ஒன்றைக் கொடுத்து 9+1 என்ன என்று கேட்டேன். டென் என்றாள் (உதவி: addition table). இப்பொழுது எண்ணிப்பார்.. உன்னிடம் டென் இருக்கும் என்றவுடன் எண்ணிப்பார்த்து சந்தோஷப்பட்டுக் கொண்டாள். அந்த சந்தர்ப்பத்தைப் பயன்படுத்தி 1+1 ஆரம்பித்தேன். முதலில் ஒரு டால்பின்னை எடுத்து வைத்துக் கொண்டு இன்னொன்றை எடுத்து வைத்து 1+1 is 2. எண்ணிப்பார் என்றதற்கு, எண்ணாமல் 2+1 is 3 என்று ஒவ்வொன்றாக வைத்துக் கொண்டே வந்து 18+1 is 19 வரை வந்துவிட்டாள். இன்று கூட்டல் குறியின் முதல் கிளாஸ். அவளுக்கு விருப்பமிருந்தால் கூட்டல் பழக்கலாம் என்று இருக்கிறேன். அவளுக்கு அதிகமா என்று முயற்சி செய்தப்பின் தெரியும்.

அடுத்து அந்த டால்பின்களை டைல்ஸ் ஜயின் கோட்டில் வரிசையாக அடுக்கச் சொன்னேன். முடித்தவுடன் கோட்டில் நடக்கச் சொன்னேன். அடுத்து கோட்டில் படாமல் ஓவ்வொரு சதுரத்திலும் குதிக்கச் சொன்னேன். எல்லாவற்றையும் மிகவும் விருப்பமாகச் செய்தாள்.

19/3/2009

இன்று முதல் முறையாக Hundred boardடில் 100 வரை அடுக்கி விட்டாள். நான் பத்து பத்தாக பிரித்துத் தந்தேன். ஆகையால் அவளுக்கு எளிதாக இருந்தது. பிரிக்காமல் இருந்திருந்தால் நிறைய எண்களில் குழப்பம் வந்திருக்கும். உதாரணத்திற்கு 67, 76, 87, 78... போன்று.30 வரை செய்ய வைக்கலாம் என்று தான் நினைத்தேன். செய்து முடித்தவுடன் அடுத்து செய்ய வேண்டும் என்றாள். இப்படியே 100 வரை செய்து விட்டோம். கிட்டத்தட்ட அரை மணி நேரம் எடுத்தது.

இன்று cuisenaire rodடில் திருப்பி அடுக்கச் செய்தேன். பத்து முதல் ஒன்று வரை அடுக்க வேண்டும். எளிதாகச் செய்தாள். முடித்தவுடன் பத்து பெரியதா ஒன்று பெரியதா என்றதற்கு, பத்து என்றாள். எப்படி என்றதற்கு பத்து தான் ஹைட்டா இருக்கு. ஒன்பது பெரியதா பத்து பெரியதா என்றதற்கும் சரியாகச் சொன்னாள். அடுத்து 9+1=10 மற்றும் 1+1=2 செய்து காட்டினேன். பெரிதாக விருப்பமிருக்கவில்லை. ஆகையால் நிறுத்திவிட்டேன். முடித்தவுடன் தூங்கச் சென்றேம். படுத்துக் கொண்டே சொல்லிக் கொண்டிருந்தாள் ஸிக்ஸை விட ஸவன் பெருசு, ஸவனை விட எயிட் பெருசு. ஸிக்ஸ் பெருசா எயிட் பெருசா என்றதற்கு ஸிக்ஸ் என்றாள்.

30/3/2009

இன்று ஸ்கேலில் கோடு போடுவதற்குச் சொல்லிக் கொடுத்தேன். முதலில் இரு வட்டங்கள் வரைந்து, அந்த வட்டங்களை இணைக்கச் செய்தேன். மிகவும் சிரமப்பட்டாள். ஆகையால் வட்டங்கள் இல்லாமல், வரையச் செய்தேன். அது பழகியவுடன், அவளாகவே வட்டங்கள் வரைந்து இணைக்க வேண்டும் என்றாள். ஆனால் வட்டங்களை இணைப்பதற்குத் தகுந்தாற் போல் அவளுக்கு ஸ்கேலின் திசையை மாற்றத் தெரியவில்லை. அதன் பின் E, F போன்ற எழுத்துக்களை ஸ்கேலினால் வரைந்து காட்டினேன். H தான் எழுதுவதாகச் சொன்னாள். ஆனால் தெரியவில்லை. ஆனால் ஸ்கேலை உபயோகப்படுத்த அவளுக்கு விருப்பமிருக்கிறது. இன்னும் சில நாட்களுக்கு இது அவளுக்கு பிடித்தமானதாக இருக்கும்.

இன்றும் Hundred board செய்தோம். ஆனால் இன்றும் நான் பத்து பத்தாகப் பிரித்து தான் தந்தேன். கிட்டத்தட்ட 90 சதவிகிதம் அவளாகவே செய்தாள்.