Monday, February 28, 2011

கவர்ந்த தருணங்கள் 1/3/2011

1. தீஷு சைக்கிள் ஓட்டிக் கொண்டிருந்தாள். நான் அவள் அருகில் நடந்து வந்து கொண்டிருந்தேன். ஒரு வளைவில் ஒரு கார் மிகவும் மெதுவாக திரும்பியது. உடனே தீஷு, "கார் ஏன் இவ்வளவு ஸ்லோவா போகுது? L போர்டா என்ன?"

2. என் கஸின் CAT ட்டில் நல்ல ச‌த‌விகித‌ம் பெற்றிருந்தும், எந்த நல்ல காலேஜிலும் இடம் கிடைக்காது என்றதை என் கணவரிடம் சொல்லிக் கொண்டிருந்தேன். உடனே தீஷு, "அம்மா, CAT ஈஸி தானே.. C-A-T னு எழுதி காலேஜில சேர்ந்திட வேண்டியது தானே"

3. பால் பாத்திரத்தில் பால் காய்ச்சியவுட‌ன் ஏற்பட்ட கறுப்பு புள்ளியைக் காட்டி "ஏன் பாக்யா பாட்டி நல்லா க்ளீன் பண்ணல"
"அப்படி சொல்லக்கூடாது.. அவுங்க நல்லாத்தான் க்ளீன் பண்ணி இருந்தாங்க.. அவுங்க கேட்டா கஷ்டப்படப் போறாங்க"
"எதுக்குக் கஷ்டப்படப் போறாங்க?"
"அவுங்க நல்லாப் பண்ணினத குறை சொல்லக்கூடாது..நீ அழகா எழுதியிருக்கிறப்ப நல்லா எழுதலனு சொன்ன உனக்கு எப்படி இருக்கும்?"
"கஷ்டமா இருக்காது.. இன்னும் நல்லா எழுதிக்காட்டனுமினு நினைச்சுக்குவேன்"

4. வாக்கிங் போய் கொண்டிருந்தோம். ஒரு சில‌ந்தி தரையில் கிட‌ந்தது. அருகில் சென்று தீஷு அத‌ன் கால்க‌ளை எண்ணி, "அம்மா, எட்டு கால் இருக்கு.. அக்டோப‌ஸ் கிட‌க்கு மா"

5. தீஷு, ஒரு இர‌வில் தூங்கும் முன், "அம்மா, இன்னைக்கு நான் ந‌ல்லா பிகேவ் ப‌ண்ணினேன்ல‌, அத‌னால‌ நாளைக்கு என‌க்கு ஒரு கிஃப்ட் கொடுங்க‌"

"என்ன‌ கிஃப்ட் வேணும்"

"அத‌ நான் சொல்ல‌க்கூடாது. அப்புற‌ம் என்ன‌ கொடுக்க‌ப்போறீங்க‌னு தெரிஞ்சிடுமே.. (அடுத்த விநாடி அவ‌ளாக‌வே) ச‌ரி..கேட்கிற‌துனால‌ செல்லுறேன்.. நாளைக்கு வேணா ப‌ன்னீர் டிக்கா ம‌சாலா ச‌மைச்சிடுங்க‌.."

6. தீஷுவை ம‌திய‌த்தில் பார்த்துக் கொண்டிருந்த‌ உத‌வியாள‌ருக்குக் குழ‌ந்தைப் பிற‌ந்திருக்கிற‌து. பத்து மாத‌மும் தீஷுவை அவ‌ர்க‌ள் பார்த்துக் கொண்டிருந்த‌தால், அவர்கள் மாற்றத்தைப் பார்த்து, தீஷு குழ‌ந்தைப் பிற‌ப்ப‌து ப‌ற்றி ஏதாவ‌து கேட்டுக் கொண்டிருப்பாள். சில‌ நாட்க‌ளுக்கு முன் என்னிட‌ம், "அம்மா நான் பிஃகான‌வுட‌ன் என‌க்குப் பாப்பா பிற‌க்கும்ல‌" என்றாள். சில‌ விநாடிக‌ள் யோசித்து விட்டு நான், "ஆமாம்" என்றேன். "பிறந்தப்பிறகு நாம பாப்பாவுக்கு அப்பாவ‌ எங்கிருந்து கூட்டிக்கிட்டு வர்றது?".

Sunday, February 27, 2011

பொம்மை உணவில் கூட்டலும் கழித்தலும்

என் அம்மா வீட்டிலிருந்து எடுத்து வந்திருந்த வெத்தலை பெட்டியை எடுத்துக் கொண்டோம். கண்ணாடி கற்களை ஒவ்வொரு இர‌ண்டடி தூரத்திற்கு ஒன்றாக வைத்திருந்தேன். கண்ணாடி கற்கள் அல்ல அவை. அவை தீஷுவின் பொம்மைகளின் உணவு. தீஷுவும் பொம்மைகளுக்கு உணவு எடுப்பதற்காக பறந்து பறந்து ஒவ்வொரு கண்ணாடி கற்களாக எடுத்து பெட்டிக்குள் வைத்துக் கொண்டே வந்தாள். கண்ணாடி கற்கள் எடுக்கும் பொழுது ஒவ்வொன்றாக கூட்ட வேண்டும். பெட்டியில் கற்கள் அதிகமாயின. அவள் எடுப்பதற்காக 10 கற்கள் அவ்வாறு வைத்திருந்தேன். அனைத்தையும் எடுத்து வந்தப்பின், வரும் வழியில் ஒரு நாய் பொம்மை அவளிடம் உணவு கேட்கும், தீஷுவும் கொடுப்பாள். ஒரு உணவு குறைந்தது. இப்பொழுது ரிவர்ஸ் கவுண்ட்டிங் ஆரம்பம். அவளிடமிருந்த உணவு குறைய ஆரம்பித்தது. கழித்தல் மற்றும் மைனஸ் போன்ற வார்த்தைகளை உபயோகப்படுத்திக் கொண்டே இருந்தேன். இவ்வாறு அவள் எடுத்த உணவில் 8 பேருக்குக் கொடுத்து விட்டு, இரண்டு தன் இரண்டு பொம்மைகளுக்கு எடுத்துச் சொன்றாள்.

பொதுவாக‌ கூட்டல் கற்கும் பொழுது, முதல் எண்ணுக்கு நேராக, அதன் மதிப்புக்கு கோடோ அல்லது வட்டமோ வரைந்து, இரண்டாவது எண்ணுக்கு நேராக, அதன் மதிப்புக்கு கோடோ அல்லது வட்டமோ வரைந்து கூட்டும் பொழுது அனைத்து கோடுகளையும் கூட்டி விடை எழுதுவோம். கழிக்கும் பொழுது முதல் எண்ணின் கோடுகளை இரண்டாவது எண்ணின் கோடுகள் அளவு அடித்து விட்டு விடை எழுதுவோம்.

நானும் தீஷுவும் கூட்டல் வெவ்வேறு முறையில் முன்பே செய்திருக்கிறோம். இங்கும், இங்கும் காணலாம். கழித்தல் கற்றது பற்றி இங்கே காணலாம். ஒரளவு கூட்டல் என்றால் என்ன என்பதை தீஷு புரிந்து கொண்டப்பின் எப்பொழுதும் கற்கும் கோடுகள் முறையில் சொல்லிக் கொடுத்தேன். ஒவ்வொரு கோடாக போடுவதில் அவளுக்கு அதிக நேரம் எடுத்தது. அவள் வேகத்தை அதிகரிக்க, கூட்டல் கணக்கில் இருக்கும் முதல் எண்ணை மனதில் நிறுத்திக் கொள்ள வேண்டும். இரண்டாவது எண்ணை விரல்களில் வைக்க வேண்டும். மனதிலுள்ள எண்ணிற்கு அடுத்த எண்ணிலிருந்து விரல்களை எண்ண வேண்டும். தீஷுவிற்கு இது எளிதாக இருந்தது.

அதேப் போல் கழித்தல் செய்யும் பொழுது மனதிலுள்ள எண்ணிற்கு முந்திய எண்ணிலிருந்து ரிவர்ஸ் கவுண்ட்டிங் செய்ய வேண்டும். தீஷுவும் செய்கிறாள். ஆனால் கூட்டலுக்கு ஏன் அதிகப்படுத்துகிறோம் என்றும் கழித்தலுக்கு ஏன் குறைக்கிறோம் என்று அவளுக்குப் புரிந்ததா என்று எனக்கு ஒர் எண்ணம். அதற்காகத் தான் இந்த விளையாட்டை விளையாண்டோம்.

மீண்டும் ஒரு முறை விளையாட‌ வேண்டும் என்று பிரிய‌ப்ப‌ட்டு விளையாண்டாள்.

Monday, February 21, 2011

அம்புலிமாமா

அம்புலிமாமா ப‌ழைய‌ ப‌திப்புக‌ளை இணையத்தில் பார்த்தவுடன் மகிழ்ச்சி. தமிழ் புத்தகங்கள் 1947 முதல் 2005 வரை கிடைக்கின்றன. தமிழ், ஆங்கிலம், கன்னட, மலையாளம், பெங்காலி, மராட்டி, ஒரியா போன்ற முக்கிய மொழிகள் அனைத்திலும் கிடைக்கின்றன. எனக்குத் தான் இது புதிய தகவலா என்று தெரியவில்லை. என் பால்யத்தில் முக்கிய இடம் கண்டிப்பாக அம்புலிமாமாவுக்கு உண்டு. http://www.chandamama.com/archive/storyArchive.htm வில் அனைத்து பழைய எடிசன்கள் உள்ளன. விளம்பரங்களும் தனியாக உள்ளன.

Sunday, February 20, 2011

குழந்தைகளுக்கான உலக மனக்கணக்குப் போட்டி



மார்ச் ஒன்றாம் தேதி உலக கணித நாள். அதை முன்னிட்டு உலக மனக்கணக்குப் போட்டி நடைபெற உள்ளது. பள்ளி ஆசிரியர் வகுப்பையோ அல்லது பெற்றோர் தன் குழந்தையையோ ரிஜிஸ்டர் செய்யலாம். போட்டி மார்ச் ஒன்றாம் தேதி நடைபெறும். 48 மணி நேரத்தில் 100 விளையாட்டுக்களுக்கு விடையளிக்க வேண்டும். ஒவ்வொரு விளையாட்டுக்கும் 60 வினாடிகள் கொடுக்கப்படும். வயது வரம்பு 4-7, 8-10, 11 - 13 மற்றும் 14-18.

மேலும் தகவல் மற்றும் ரிஜிஸ்டர் செய்ய இங்கே செல்லவும்.

Saturday, February 19, 2011

One more transferring

வெகு நாட்களுக்கு முன் செய்த ஆக்டிவிட்டி இது.

Tongs மூலம் மாற்றுதல் தீஷுவின் பழைய மாண்டிசோரி பள்ளியில் பார்த்து இருக்கிறேன். முன்பே முயற்சி செய்தோம். ஆனால் அப்பொழுது அளவு சரியாக இல்லாததால், அவளுக்குச் செய்ய விருப்பமிருக்கவில்லை. புருவம் திருத்த பயன்படும் கருவி பயன்படுத்தலாம் என்று அதை வாங்கினோம்.



பாசியை ஒரு தட்டிலிருந்து மறு தட்டிற்கு மாற்றச் சொன்னேன். தீஷு விருப்பமாக செய்தாள். தட்டு இலை வடிவில் இருந்தது. இலையின் நரம்புகள் போல் கோடுகளும் இருந்தன. அவளாகவே அந்த கோட்டின் மேல் வைத்துக் கொண்டே வந்தாள். அவள் ஆர்வத்தைத் தக்க வைத்தது.

இது எழுத பயன்படும் விரல்களுக்கானப் பயிற்சி.

Friday, February 18, 2011

ஒரு சிறு விளையாட்டு

தீஷுவிற்கு பள்ளியில் சொல்லிக் கொடுக்கும் ஸிலபஸ் எனக்குத் தெரியும் என்பதால், ஒரளவு அவளுக்கு வீட்டியேலே சொல்லிக் கொடுத்துவிடுவேன். அவளுக்கு அது பள்ளியில் சொல்லிக் கொடுக்கும் பொழுது மிகவும் எளிதாக இருக்கிறது. அவர்கள் சொல்லிக் கொடுக்கும் முறை வேறு மாதிரி இருந்தாலும், நான் அவளுக்குப் பொருட்கள் வைத்து சொல்லிக் கொடுப்பது அவளுக்குப் பிடித்திருப்பதாக அவளே சொல்லுவதால் இம்முறை தொடருகிறது.

தீடீரென ஒரு நாள் இரண்டு இலக்க கூட்டல் வீட்டுப்பாடமாக வந்தது. இரண்டு இலக்க கூட்டல் ஸிலபஸில் இல்லை. தீஷு வயதிற்கு அது அதிகம் என்று நானும் சொல்லிக் கொடுத்ததில்லை. இரண்டு இலக்க கூட்டலுக்கு முன் ஒன்ஸ், டென்ஸ் தெரிந்து இருக்க வேண்டும். ஏனென்றால் எண்களை வாசிக்கும் பொழுது இடமிருந்து வலம் வாசிக்கும் நாம், கணக்கை கணிக்கும் பொழுது வலமிருந்து இடமாக செய்ய வேண்டும். முதலில் ஒன்ஸை கூட்டி, அடுத்து டென்ஸை கூட்ட வேண்டும். அது ஏன் என்று தீஷுவிற்கு புரிய வேண்டும் என்று நினைத்தேன்.

ஒரு தட்டில் பாசிகளும், நான்கு கிண்ணங்களும் எடுத்துக் கொண்டோம். ஒரு தாளை மூன்றாக கோடிட்டு பிரித்து Tens, Ones & Number என்று எழுதிக் கொண்டேன். முதலில் பாசியை எடுத்துக் கொள்ள வேண்டும். Ones கட்டத்தில் ஒவ்வொன்றாக வைத்துக் கொண்டே வர வேண்டும். பத்து வந்தவுடன் கிண்ணத்தில் போட்டு, கிண்ணத்தை Tens கட்டத்தில் வைத்து விட வேண்டும். இவ்வாறு ஒவ்வொரு பத்தும் ஒவ்வொரு கிண்ணத்தில் போட வேண்டும். பத்து பத்தாகத் தான் கிண்ணத்தில் போடுவதால், மீதம் இருக்கும் ஒன்றை எண் பாசிகள் ones கட்டத்திலேயே இறுதியில் இருந்து விடும். இருபது பாசிகள் அளவில் மட்டுமே தீஷுவால் அள்ள முடிந்ததால், அவள் விரும்பும் வரை எடுத்து கிண்ணங்களில் போட சொன்னேன்.

அனைத்து அள்ளிய பாசிகளையும் இவ்வாறு போட்டப் பின் கிண்ணங்களை எண்ணும் பொழுது 1 டென்ஸ், 2 டென்ஸ் என்று எண்ண வேண்டும். மொத்தம் எடுத்த பாசிகள் எவ்வளவு என்பதை கண்டுபிடித்து நம்பர் கட்டத்தில் எழுத வேண்டும். மொத்தம் எடுத்த பாசிகள் கிண்ணங்களின் எண்ணிக்கை * 10 + ஒன்ஸ் கட்டத்தில் இருக்கும் பாசி.

இதன் மூலம் ஒன்ஸ், டென்ஸ் புரிந்தது. ஏன் ஒன்ஸ் கூட்டி முடித்து டென்ஸ் செய்கிறோம் என்றும் புரிந்தது. அடுத்து carry over கூட்டல் செய்யும் பொழுது எதற்கு carry over செய்கிறோம் என்றும் புரியும் என்று நினைக்கிறேன்.

Wednesday, February 2, 2011

Magic drawing

இப்பொழுது மாஜிக் டிராயிங் (Magic drawing) புத்தகங்கள் கிடைக்கின்றன. ஒரு வெள்ளை குச்சியால் முதலில் வரைய வேண்டும். வரைந்தது தெரியாது. அதன் மேல் பெயிண்ட் செய்தால், வரைந்த படம் தெரிய ஆரம்பிக்கும். படம் பெயிண்ட்டை தன் மேல் படர விடாமல் தனியாகத் தெரியும்.


அந்த வெள்ளை குச்சி மெழுகு. வெள்ளை கிரையான் கொண்டும் செய்யலாம். இந்த technique பெயர் crayon resist. தீஷுவிற்கு 5 *5 ஆக இருபத்து ஐந்து கட்டங்கள் வரைந்து கொடுத்தேன். A முதல் Z வரை மெழுகால எழுத சொன்னேன். Y & Z ஒரே கட்டத்தில் எழுதினாள். எழுதியது கூர்ந்து பார்த்தால் மட்டுமே தெரிந்தது.




அதன் பின் என் வாட்டர் கலர் எடுத்துக் கொடுத்தேன். பெயிண்ட் அடித்தும் எழுத்துக்கள் சரியாக தெரியவில்லை. என் வாட்டர் கலரில் வண்ணத்தின் அளவு அதிகமாக இருப்பது காரணமாக இருக்கும் என நினைத்து தீஷுவின் வாட்டர் கலர் எடுத்துக் கொடுத்தேன். அப்பொழுது நன்றாகத் தெரிந்தது.



தீஷுவிற்கு மிகவும் பிடித்திருந்தது.

 
Design by Free WordPress Themes | Bloggerized by Lasantha - Premium Blogger Themes | Web Hosting Bluehost